Белгілі бір ақпаратты зерттеу ұйымдастырушыларымен бөлісуге болады. Мұндай ақпаратқа iOS және watchOS құрылғыларындағы датчиктерден немесе құрылғыларыңызбен жұптастырылған басқа датчиктерден алынған мәліметтер, сондай-ақ құрылғыларыңыз бен бағдарламалық жасақтаманы қалай пайдаланатыныңыз туралы мәліметтер кіреді. Бұл датчик пен қолданыс деректері өзге жағдайларда осы қолданбалар үшін қолжетімсіз әртүрлі көздерден алынған мәліметтерді қамтуы мүмкін.

Ақпаратты бөлісу әрекетіне рұқсат бергеннен кейін ғана «Датчиктер мен қолданыс деректері» зерттеу ұйымдастырушыларына жіберіледі. Бұл ақпарат сіз қатысуға шешім қабылдаған зерттеулер аясында ғана қолжетімді. Apple компаниясы «Датчик пен қолданыс деректері» функциясына қол жеткізу сұрауын жібермес бұрын, зерттеу қолданбалары мен зерттеулерге белгілі бір талаптар қояды. Бұл талаптар мыналарды қамтиды:

• Зерттеу қолданбасының негізгі мақсаты денсаулық пен өмір салтына байланысты зерттеулер жүргізу болуы керек.
• Зерттеу қолданбасын әзірлеуші деректерді жинауға, пайдалануға және бөлісуге қатысты қолданыстағы белгілі бір шектеулерді сақтауға келіседі, оның ішінде әзірлеуші деректерді жинау жүзеге асырылатын немесе оларға қол жеткізу сұралатын зерттеу шеңберінде бөлісуге шешім қабылдаған датчиктер мен қолданыс деректерін ғана өңдеуге келіседі.
• Әрбір зерттеу әдеп жөніндегі комитетпен қаралуы тиіс.

Дерек түрлері

Датчик деректері iOS және watchOS құрылғыларының датчиктерінен (жарық датчиктері, акселерометрлер және гироскоптар сияқты) немесе зерттеу барысында қолдануға болатын басқа құрылғылардан алынады. Осылайша жіберілетін деректер iOS, watchOS немесе құрылғылардың бірімен жұптастырылған басқа датчиктерден алынған көрсеткіштер мен бағалау деректерін қамтуы мүмкін. Мысалы, бетіңіздің позицияларын және әлпеттерін (мысалы, қасыңызды көтеру немесе ерніңізді түйістіру) немесе дауысыңыздың ерекшеліктерін (мысалы, дыбыс деңгейі, ырғағы, жоғарылығы мен қарқыны) дәл өлшеу. Бұл ақпарат өңделмеген аудио деректерді немесе фотоларды қамтымайды.

Қолданыс деректері — iOS және watchOS құрылғылары мен бағдарламалық жасақтамаларын пайдалану және олармен өзара әрекеттесу туралы ақпарат. Мысалы, ақпараттың бұл түріне пернетақтаны пайдалануға қатысты ақпарат, жіберілген хабарлар саны, шалынған және қабылданған қоңыраулар саны, қолданылатын қолданбалар мен веб-сайттар санаттары, белгілі бір датчик пен пайдалану оқиғалары жазылған және Apple Watch сағатын таққан уақыт туралы ақпарат кіруі мүмкін. Зерттеушілер деректер санатындағы жалпы идентификаторларға негізделген зерттеуге арналған пайдалану және датчик деректерінің әртүрлі санаттарын салыстыруы мүмкін.

Кейбір датчик және қолданыс деректері үшін зерттеу қолданбасына қолжетімді ақпарат басқа қолданбалар үшін қолжетімді деректерге қарағанда егжей-тегжейлі немесе жоғарырақ ажыратымдылықта болуы мүмкін. Зерттеуге арналған қолданбаларда жиналған деректерді зерттеуге экспорттау үшін фондық режимде жұмыс істеу мүмкіндігі болуы мүмкін.

Деректерді бөлісу және сақтау

Датчиктер мен қолданыс деректері «Қозғалыс», «Сөйлеу», «Қадамөлшегіш» және «Хабарлар» сияқты санаттарға топтастырылған. Қатысатын әрбір жеке зерттеуге қандай деректер санаттарына қол жеткізу мүмкіндігін ұсыну қажеттігін өзіңіз шешесіз. Тіркелу кезінде датчиктер мен қолданыс деректеріне қол жеткізуді сұрайтын зерттеу қолданбасы әр санат бойынша сізден деректерді бөліскіңіз келетінін сұрайды. Сізден датчиктер мен қолданыс деректерін, сондай-ақ берілген деректер санаттарын алатын қолданбалар мен зерттеулерді кез келген уақытта көруге болады. Ол үшін «Реттеулер» > «Құпиялылық және қауіпсіздік» > «Датчик пен қолданыс деректері» тармағына өтіңіз.

Сіздің келісіміңізбен датчиктер мен қолданыс деректері зерттеу аясында watchOS немесе iOS құрылғыларында жиналады. Деректер қандай да бір мақұлданған зерттеуге жіберілмес бұрын iOS құрылғыңызда шамамен бір күн (немесе белгілі бір деректер үшін жеті күнге дейін) сақталады. Осы кезеңде кез келген деректерді жоюға болады және олар ешбір зерттеу ұйымдастырушысына берілмейді. Осы датчик пен қолданыс деректері iOS құрылғыларында жеті күнге дейін сақталады. Жеті күннен кейін бұл деректер iOS құрылғыларынан автоматты түрде және біржолата жойылады және қол жеткізу рұқсатын кейін алатын зерттеу ұйымдастырушысына ұсынылмайды.

«Реттеулер» > «Құпиялылық және қауіпсіздік» > «Датчик пен қолданыс деректері» тармағына өту арқылы кез келген уақытта датчиктер мен қолданыс деректерін бөлісуді тоқтатуға болады. Егер датчиктер мен қолданыс деректерін зерттеу ұйымдастырушыларымен бөлісуді тоқтату қажет деп шешсеңіз, кейінгі деректер бұдан әрі оларға ұсынылмайды, дегенмен зерттеу ұйымдастырушылары бұрын ұсынылған кез келген деректерге қол жеткізе алатын болады. Бұрын бөліскен датчиктер мен қолданыс деректерін жою немесе оларға қол жеткізу мүмкіндігін өшіру мүмкін емес. Егер зерттеу ұйымдастырушыларымен деректерді бөлісуді тоқтатсаңыз немесе зерттеу қолданбасын жойсаңыз, сіз зерттеуден шығарылмауыңыз мүмкін. Егер зерттеуге қатысудан бас тартқыңыз келсе, зерттеу келісімінде берілген нұсқауларды орындауыңыз керек.

2023 жылғы 18 қыркүйек