iCloud жеке торабы («Жеке торап») — бұл iCloud+ жазылымы аясында ұсынылатын интернеттегі құпиялылық сервисінің жаңа түрі, ол Safari браузерін интернетті шолу үшін пайдаланған кезде сіздің құпиялылығыңызды қорғайды, сондықтан ешқандай ұйым, соның ішінде Apple және интернет провайдерлері сіздің жеке басыңызды интернетті шолу әрекеттеріңіз бойынша сәйкестендіре алмайды. Жеке торап сонымен қатар сіздің құпиялылығыңызды одан әрі қорғау үшін құрылғыдан шыққан шифрланбаған трафикті және домендік атаулар серверіне (DNS) жіберілген сұрауларды шифрлайды. Домендік атаулар сервері (DNS) — бұл веб-сайт атауларын интернет протоколының (IP) мекенжайларына түрлендіретін жүйе. Жеке торап тек iOS, iPadOS және macOS жүйелерінде қолжетімді.

Интернетке қосылу сұрауларыңыз әртүрлі ұйымдар басқаратын екі дербес торап арқылы жіберіледі. Бірінші торап сіз кірген веб-сайт туралы емес, IP мекенжайыңыз туралы ақпаратты біледі. Екінші торапқа сіз кірген веб-сайт туралы ақпарат белгілі, бірақ одан IP мекенжайыңыз жасырылған. Оның орнына торап мақсатты веб-сайтқа пайдаланушының жеке басы және геолокациясы туралы жалпылама ақпаратты береді. Осылайша ешбір ұйым жеке басыңызды және сіз кіретін сайттарды анықтауға мүмкіндік беретін ақпаратқа ие болмайды.

Құпиялылықты қорғау мақсатында, сонымен бірге веб-сайттарға сіздің аймағыңызда контентті ұсынуға мүмкіндік беру үшін, жеке торап бастапқы IP мекенжайыңыздың жалпыға қолжетімді геолокациясы негізінде шамамен алғандағы аймақты есептейді. Сіздің құрылғыңыз аймақ туралы осы болжалды ақпаратты шифрланған түрде екінші торапқа жібереді, одан соңғы адресатқа жіберілетін жалпы IP мекенжайы алынады. «Жеке торап» функциясын пайдаланған кезде, жақын маңдағы компанияларды әлі де іздей аласыз, бірақ веб-сайттар белгілі бір адамға емес, болжалды аймаққа қатысты IP мекенжайын ғана көретін болады. Бұл геолокация реттеуін өшіруге және веб-сайттарға геолокация туралы азырақ ақпарат беруге болады. Ол үшін iOS немесе iPadOS құрылғысында «Реттеулер» > «[Сіздің атыңыз]» > «iCloud» > «Жеке торап» > «IP мекенжайының геолокациясы» тармағын ашып, «Қолданыс елі және уақыт белдеуі» опциясын қосу үшін түртіңіз. Mac компьютерінде «Жүйе реттеулері» > «[сіздің атыңыз]» > «iCloud» > «Жеке торап» тармағына өтіңіз.

Жеке торапты кез келген уақытта өшіруге болады. Ол үшін «Реттеулер» > «[атыңыз]» > «iCloud» > «Жеке торап» тармағына өтіп, «Жеке торап» опциясын өшіріңіз. Сондай-ақ iOS немесе iPadOS құрылғыңыздағы белгілі бір Wi-Fi желілері үшін «Жеке торап» функциясын кез келген уақытта өшіруге болады. Ол үшін «Реттеулер» > «Wi-Fi» тармағына өтіп, желінің жанындағы «Ақпарат» түймесін түртіп, «iCloud жеке торабы» параметрін түртіңіз. Mac компьютерінде «Жүйе реттеулері» > «[сіздің атыңыз]» > «iCloud» > «Жеке торап» тармағына өтіп, «iCloud жеке торабы» опциясын өшіру үшін «Опциялар», содан кейін «Өшіру» түймесін басыңыз.

Apple жеке деректерді тек жинау мақсаттарын орындау үшін қажет болғанша, соның ішінде Apple құпиялылық саясатында немесе қызметке тән құпиялылық туралы хабарламаларымызда сипатталғандай немесе заң талап еткендей сақтайды. Сақтау мерзімдерін бағалау кезінде алдымен жиналған жеке деректерді сақтау қажет пе, жоқ па, соны мұқият тексереміз және сақтау қажет болса, жеке деректерді заңмен рұқсат етілген ең қысқа мерзім ішінде сақтау үшін жұмыс істейміз.

Apple жинаған ақпарат әрқашан Apple құпиялылық саясатына (www.apple.com/privacy) сәйкес өңделеді

2023 жылғы 18 қыркүйек