-
Apple TV қолданбасы және құпиялылық
-
Ойнату туралы деректер, іздеу әрекеттері, сатып алулар мен құрылғының сенімділік индексі сізге ұсынылатын сервистерді дербестендіру, сервисті жақсарту, хабарландырулар жіберу және алаяқтықтың алдын алу мақсатында пайдаланылуы мүмкін. Құрылғының сериялық нөмірі сізге сәйкес ұсыныстарды беру үшін пайдаланылуы мүмкін.
Apple TV қолданбасы жеке ақпаратыңызды қорғайтындай және бөлісу қажет объектілерді таңдауға мүмкіндік беретіндей етіп жасалған.
-
- Apple TV қолданбасы барлық таңдаулы телешоу мен фильмді бір жерге жинайды және сізді қызықтыруы мүмкін басқа контентті ұсынады.
- Apple компаниясы сіздің сатып алуларыңыз, жүктеп алуларыңыз және Apple TV қолданбасындағы әрекеттеріңіз, Apple TV қолданбасында және қолдау көрсетілетін кез келген құрылғыларыңыздағы байланысты қолданбаларда қандай контентті және оны қандай құрылғыда қарайтыныңыз туралы ақпаратты жинайды. Біз бұл ақпаратты сервис жұмысын қамтамасыз ету және Apple TV қолданбасын өзіңіз бен басқа пайдаланушылар үшін жақсарту мақсатында пайдаланамыз.
- Сондай-ақ біз сіздің сатып алуларыңыз, жүктеп алуларыңыз және Apple TV қолданбасындағы әрекеттеріңіз, қандай контентті және оны қандай құрылғыда қарайтыныңыз туралы ақпаратты жинаймыз. Осының арқасында біз функцияларды бейімдеп және ұсыныстарды дербестендіріп, сізге хабарландырулар жібере аламыз. Деректерді осындай мақсатпен пайдаланудан төменде сипатталғандай бас тартуға болады.
- Сатып алынған және жүктеп алынған фильмдер мен телешоулар туралы ақпарат App Store, Apple News және «Акциялар» қолданбасында (бар болса) сізге сәйкес келетін жарнамалар ұсыну мақсатында пайдаланылады. Төменде сипатталғандай, бұл жарнаманың реттеулерін басқаруға болады.
- Қандай да бір өнімді сатып алған кезде, алаяқтықты анықтау және алдын алу мақсатында құрылғыны қалай пайдаланатыныңыз туралы ақпарат, соның ішінде кіріс және шығыс телефон қоңыраулары мен эл. хабарлардың болжалды саны құрылғының сенімділік индексін есептеу үшін пайдаланылады. Индексті жіберген кезде, Apple компаниясына осы индексті есептеуге негіз болған нақты мәндер берілмейді. Сенімділік индекстері серверлерімізде белгілі бір уақыт ішінде сақталады.
Apple TV қолданбасы барлық таңдаулы телешоулар мен фильмдерді біріктіреді. Apple компаниясынан жалға алынған немесе сатып алынған контентті көруге болады. Сондай-ақ қолжетімділігіне қарай контентке Apple TV+, Apple TV арналары және қосылған үшінші тараптық видео қолданбалары арқылы қол жеткізуге болады. Жоғарыда аталған барлық контентке бірдей Apple ID аккаунтын пайдаланатын барлық қолдау көрсетілетін құрылғыда Apple TV қолданбасы арқылы қол жеткізуге болады.
Apple TV қолданбасын ұсыну
Apple TV қолданбасындағы сервистер мен функцияларды қамтамасыз ету үшін жеке деректеріңізді пайдаланамыз. Бұл ақпарат «Реттеулер» мәзірінен қол жеткізуге және өзгертуге болатын аккаунт пен төлем туралы ақпаратты қамтиды.
Apple компаниясы бірдей Apple ID аккаунты қолданылатын кез келген қолдау көрсетілетін құрылғыдағы Apple TV қолданбасында қандай нысандарды сатып алатыныңыз және нені қарайтыныңыз туралы ақпаратты жинайды. Apple компаниясы осы ақпаратты Apple ID аккаунтыңызбен байланыстырылған күйде сақтайды, осылайша біз қолдау көрсетілетін құрылғыларыңызда қарап отырған контентті көрсете аламыз. Үшінші тарап қолданбаларына кірген кезде, сізге қолжетімді контентті көрсету мақсатында осы сервистерге жазылғаныңыз туралы ақпарат пайдаланылады. Егер үшінші тарап қолданбасына Apple TV қолданбасымен байланысуға рұқсат берсеңіз, Apple компаниясы қолдау көрсетілетін кез келген құрылғыларыңыздағы осы қолданбадан көрген контент, сондай-ақ жазылым күйі туралы ақпаратты жинайды және сақтайды. Apple TV қолданбасы іске қосылған кезде, Apple Music сияқты қолдау көрсетілетін контенті бар Apple қолданбалары автоматты түрде қосылады.
Сіз көретін контент туралы ақпаратта қандай контентті ойнатқаныңыз, оны қашан және қай құрылғыда ойнатқаныңыз және контенттің қай жерінде кідірту немесе тоқтату түймесін басқаныңыз туралы мәліметтер көрсетіледі. Сондай-ақ біз Apple TV және Apple TV+ арналарын көруге қатысты барлық әрекет туралы толық ақпарат жинаймыз.
Егер Apple TV қолданбасына геолокацияңызға қол жеткізуге рұқсат берсеңіз, онда геолокацияңыз сіз орналасқан аймақта қолжетімді ойындар, оқиғалар және жаңалықтар сияқты контентті анықтау үшін пайдаланылады. Кейбір контентте геолокация негізіндегі жарнамалар бар.
Apple TV қолданбасын жақсарту
Apple компаниясы Apple TV қолданбасын қалай пайдаланатыныңыз және аккаунтыңыз туралы ақпаратты, оның ішінде сіз пайдаланатын функциялар, іздеу сұрауларыңыз, хабарландыруларыңыз, сіз іздейтін немесе қарайтын контент беттері, қолданбаның қателері мен ақаулары және есепшотқа арналған пошта индексі туралы ақпаратты жинайды. Біз бұл ақпаратты, жеке басыңызды анықтамайтын болжалды геолокация туралы ақпаратты және көрілген контент туралы деректерді сервисті сіз және басқа пайдаланушылар үшін жақсарту және оңтайландыру мақсатында пайдаланамыз. Сондай-ақ құрылғы түрі, оны сатып алу әдісі, операциялық жүйе нұсқасы және бос орын көлемі сияқты құрылғыңыз туралы ақпаратты жинаймыз. Бұл ақпаратты сұралған контентті жүктеп алу мүмкіндігінің бар-жоғын бағалау, құрылғыны және сақтау орнын пайдаланудағы жалпы трендтерді түсіну және құрылғыңыздың Wi-Fi желісіне немесе ұялы байланыс желісіне қосылған-қосылмағанын білу мақсатында пайдалануымыз мүмкін. Мысалы, құрылғыдағы бос орын көлемі туралы ақпарат iPhone құрылғысында фильмдерді сатып алу кезінде оларды жүктеп алмай сатып алуға мүмкіндік беретін функция жұмысын қамтамасыз етеді. Егер басқа пайдаланушылармен бірге контент қарау үшін SharePlay функциясын пайдалансаңыз, Apple TV қолданбасы SharePlay сеансы барысында қандай контентті қарайтыныңыз және сеансқа қатысқан құрылғылар саны туралы ақпаратты жинайды. SharePlay сеансына қатысушылардың жеке басын анықтайтын ақпарат жиналмайды.
Apple TV қолданбасын дербестендіру
Apple TV қолданбасын сізге ең жарамды контентті табуға көмектесу мақсатында дербестендіреміз. Мысалы, бұрын көрген фильмдер негізінде сізге ұнауы мүмкін фильмдер ұсынамыз. Дербестендіруді қамтамасыз ету мақсатында біз Apple TV қолданбасы арқылы қаралған контент (шолу тарихы), жасалған сатып алулар, жазылымдар, жүктеп алынған нысандар және басқа әрекеттер туралы ақпаратты, сондай-ақ аккаунтыңыздағы ақпаратты (мысалы, жасыңыз) пайдаланамыз.
Егер Apple компаниясының осы құрылғыдағы Apple TV қолданбасында нені қарайтыныңыз туралы ақпаратты пайдаланғанын және сол арқылы Apple TV қолданбасын қолдайтын барлық құрылғыда функцияларды дербестендіргенін қаламасаңыз, «Реттеулер» бөлімінде «Ойнату тарихын пайдалану» функциясын өшіруге болады. iOS немесе iPadOS құрылғысында «Реттеулер» > «TV» > «Ойнату тарихын пайдалану» тармағына өтіңіз. visionOS немесе tvOS құрылғыңызда «Реттеулер» > «Қолданбалар» > «Теледидар» > «Ойнату тарихын пайдалану» тармағына өтіңіз.
App Store, iTunes Store, Apple TV, Apple Books және Apple Podcasts сервистерінде және Apple жазылымдары үшін дербестендіру мүмкіндіктерін өшіруге болады. Ол үшін Apple ID аккаунтыңыздың «Дербестендірілген ұсыныстар» опциясын өшіріңіз. iOS, iPadOS немесе visionOS құрылғыңызда «Реттеулер» > «[атыңыз]» > «Медиа және сатып алулар» > «Аккаунтты көру» тармағы арқылы өтіңіз, содан кейін «Дербестендірілген ұсыныстар» опциясын түртіп өшіріңіз. Mac компьютеріндегі Apple TV қолданбасында «Аккаунт» > «Аккаунт реттеулері» > «Реттеулер» тармағына өтіңіз.
Кері байланыс
Apple компаниясы Apple TV қолданбасы және сізге ұнауы мүмкін басқа Apple өнімдері, сервистері мен ұсыныстары, сондай-ақ Apple One жөнінде ақпарат жіберу үшін Apple өнімдеріңіз, сіз жазылған Apple сервистері, сіз жүктеп алатын Apple қолданбалары және есепшотқа арналған пошта индексіңіз сияқты аккаунтыңыз туралы ақпаратты пайдалануы мүмкін. Құрылғының сериялық нөмірі сияқты құрылғыңыз туралы мәліметтер немесе өзекті App Store жазылымдарыңыз туралы мәліметтер сізге жарамды Apple сервистік ұсыныстарын беру үшін пайдаланылуы мүмкін. «Отбасылық қол жеткізу» функциясын пайдалансаңыз, Apple компаниясы «Отбасылық қол жеткізу» аясында өнімдер, сервистер және ұсыныстар туралы ақпарат жіберуі мүмкін. Apple One жазылымын алсаңыз, сіз жазылған сервистерде қолжетімді функциялар туралы эл. пошта хабарлары мен push хабарландыруларын жіберуіміз мүмкін. Сондай-ақ Apple компаниясы Apple TV қолданбасында қолжетімді жаңа функциялар, контент пен ұсыныстар жөнінде эл. пошта хабарлары мен push хабарландыруларын жіберу үшін Apple TV қолданбасындағы белсенділігіңіз туралы ақпаратты пайдалануы мүмкін. Эл. пошта параметрлерін өзгерту және осы эл. хабарларды алудан бас тарту үшін мына сайтқа өтіңіз: appleid.apple.com. iOS, iPadOS немесе visionOS құрылғыңызда хабарландыру параметрлерін жаңарту үшін «Реттеулер» > «Хабарландырулар» > «Теледидар» тармағына өтіңіз.
Жарнама
Apple TV қолданбасында Apple TV қолданбасына геолокацияңызға қол жеткізуге рұқсат берілсе, ол геолокацияңыз негізінде жарнама көрсету үшін пайдаланылуы мүмкін.
App Store, Apple News және «Акциялар» сияқты басқа қолданбалар үшін «Дербес жарнамалар» реттеуі қосулы болса, Apple жарнама платформасы сіз туралы ақпаратты (оның ішінде Apple компаниясынан сатып алынған фильмдер мен телешоулар туралы ақпарат) сізге сәйкес келетін жарнамалар көрсету үшін пайдалануы мүмкін.
Apple жарнама платформасынан қызығушылықтарыңызға негізделген жарнамалар алғыңыз келмесе, «Дербес жарнамалар» параметрін өшіруге болады. «Дербес жарнамалар» параметрін өшірсеңіз, Apple компаниясы ақпаратыңызды таргеттелген жарнама үшін пайдалана алмайды. Бұдан көрсетілетін жарнамалар саны азаймайды, бірақ сізге қатыссыз жарнамалар көрсетілуі мүмкін.
«Дербес жарнамалар» реттеулерін «Реттеулер» > «Құпиялылық және қауіпсіздік» > «Apple жарнамасы» тармағына өту арқылы өзгертуге болады.
Apple жарнамасы мен құпиялылығы туралы толығырақ ақпарат алу үшін мына сілтемеге өтіңіз: www.apple.com/legal/privacy/data/kz/apple-advertising.
App Store, Apple News және «Акциялар» қолданбаларындағы дербес жарнамалардан бас тарту туралы ақпарат алу үшін support.apple.com/kb/HT202074 мекенжайы бойынша өтіңіз.
Үшінші тараптармен бөлісу
Өнімдеріміз бен сервистерімізді әзірлеу үшін Apple компаниясымен бірге жұмыс істейтін, маркетингтік қызметті жүргізуге және Apple атынан App Store дүкенінде, Apple News сервисінде және «Акциялар» қолданбасында көрсетілетін жарнамаларды сатуға көмектесетін жарнама берушілеріміз бен стратегиялық серіктестерімізге жеке басыңызға қатысы жоқ кейбір деректерді ұсынамыз. Мысалы, сатып алуларыңыз бен қаралған контент туралы жеке басыңызға қатысы жоқ деректерді, сондай-ақ жас тобы мен жынысы (атыңыз бен Apple ID аккаунтыңыздағы сәлемдесу негізінде анықталуы мүмкін ақпарат) және аймақ сияқты пайдаланушылардың жалпы демографиялық деректерін контент иелері сияқты Apple TV стратегиялық серіктестерімен бөлісуіміз мүмкін. Бұл ақпарат негізінде олар шығармашылық жұмыстарының өнімділігін бағалау, қаламақы төлеу және бухгалтерлік есеп бойынша талаптарды орындау, сондай-ақ өнімдері мен сервистерін жақсарту мүмкіндігіне ие болады.
Мобильді желі провайдері Apple TV+ жазылымдары мен тегін сынақ нұсқаларын ұсынса, Apple компаниясы мобильді желі провайдерінің серіктестік ұсынысын пайдалана алатыныңызды анықтау үшін телефон нөміріңізді тексеруі мүмкін. Ақылы немесе сынақ нұсқасындағы Apple TV+ жазылымын мобильді желі провайдері немесе басқа Apple серіктесі арқылы алсаңыз, Apple компаниясы телефон нөміріңізді немесе серіктес бөліскен бірегей аккаунт идентификаторын аккаунтыңызды растау және мобильді желі провайдеріне немесе басқа серіктеске жазылымды белсендіргеніңізді хабарлау үшін пайдаланады. Жазылымыңызбен байланыстырылған телефон нөмірін немесе бірегей идентификаторды жүйеге кіру кезінде аккаунтты растау және Apple TV+ жазылымыңызды аккаунтыңызбен байланыстыру үшін пайдаланамыз.
Apple TV қолданбасына басқа өндірушінің құрылғысынан кіргіңіз келсе, Apple компаниясы платформа провайдеріне қолданбаның жұмыс істеуін қамтамасыз ету үшін белгілі бір ақпаратты жіберуі мүмкін. Осылайша Apple TV сервисіндегі жазылымдар контенті платформада пайда болады, сонымен қатар іздеу нәтижелері мен дербестендірілген ұсыныстар беру сияқты платформа функцияларына қолдау көрсетіледі. Мұндай ақпарат Apple TV қолданбасын ашқаныңыз және қолжетімді болса, Apple TV+ және Apple TV арналарына жазылғаныңыз туралы ақпаратты қамтуы мүмкін. Apple өнімі болып табылмайтын басқа құрылғыдағы Apple TV қолданбасының реттеулеріне өту арқылы жазылымдар туралы ақпараттың үшінші тараптарға берілуін болдырмауға болады, алайда бұл Apple TV контентін платформада көрсету мүмкіндігін шектеуі мүмкін.
Apple өнімі болып табылмайтын қолдау көрсетілетін басқа құрылғыларда Apple TV қолданбасында, соның ішінде Apple TV+, Apple TV арналарында үшінші тарап платформасының провайдеріне өзіңіз көретін контент, сатып алатын немесе жалға алатын заттар туралы ақпаратты және басқа контентті (қолжетімді болса) ұсыну қажеттігін таңдай аласыз. Бұл профиль атыңызды немесе Apple TV қолданбасындағы деректеріңізді Apple өнімі болып табылмайтын басқа құрылғыңыздағы аккаунтыңызбен немесе профиліңізбен сәйкестендіру үшін пайдаланылатын басқа ақпаратты қамтуы мүмкін. Платформаңыздың провайдері Apple TV қолданбасындағы ақпаратыңызды платформаның функцияларын, мысалы, көріп жүрген шоуларыңызды және жеке ұсыныстарды көрсету үшін пайдалануы мүмкін. Бұл функцияны Apple өнімі болып табылмайтын басқа құрылғыдағы Apple TV қолданбасының реттеулеріне өту арқылы өшіруге болады. Кейбір құрылғыларда бұл әрекет сізді платформаның реттеулеріне әкелуі мүмкін.
Apple TV қолданбасына Apple өнімі болып табылмайтын басқа құрылғыдан кіргіңіз келсе, платформа провайдерінің шарттарымен, құпиялылық саясатымен және тәжірибелерімен танысып шығуыңыз керек, сонда платформа қандай деректерді жинайтынын, пайдаланатынын және тарататынын түсіне аласыз.
Деректерді сақтау
Біз Apple TV қолданбасындағы сатып алуларға, жүктеп алуларға және қаралған контентке қатысты жеке деректеріңізді сақтаймыз. Деректерді сақтау мерзімі ұйымдастырушылық талаптарға, шарттық міндеттемелерге және заңнама ережелеріне байланысты болады. Сатып алулар мен жүктеп алынатын нысандар үшін сақтау кезеңі әдетте кем дегенде 10 жылды құрайды, бірақ Қытай сияқты аймақтарда бұл кезең 30 жылға жетуі мүмкін. Сондай-ақ контентті сатып алу және жүктеп алу туралы жазбалар аккаунтыңыз жойылмайынша сақталып тұра береді. Бұл сізге осы контентті қолданыстағы шарттарға сәйкес жүктеп алуға мүмкіндік береді. Интернеттегі белсенділік және іздеу әрекеттері сияқты басқа ақпаратты екі жылға дейін сақтаймыз. Сақталған мәліметтерден басқа кейбір ақпарат аккаунтты жойғаннан кейін де немесе Apple TV қолданбасын пайдаланбай кетсеңіз де бухгалтерлік жазбаларда сақталуы мүмкін.
Төлем картасын пайдаланғанда, Apple компаниясы картаңыздың нөмірін және төлеуші туралы ақпаратты болашақтағы сатып алулар, қайталама транзакциялар немесе рұқсат етілген басқа да әрекеттер үшін сақтап, автоматты түрде жаңартуы мүмкін. Apple компаниясы бұл ақпаратты қаржы мекемесінен немесе төлем жүйесінен алып, оны алаяқтықтың алдын алу және деректерді тексеру мақсатында пайдалануы мүмкін.
Ойнату тарихын тазалау
Apple TV қолданбасының ойнату тарихын «Реттеулер» бөлімінде тазалауға болады. iOS, iPadOS немесе visionOS құрылғысындағы Apple TV қолданбасында «Аккаунт» > «Ойнату тарихын тазалау» тармағына өтіңіз. tvOS құрылғысында «Реттеулер» > «Қолданбалар» > «TV» > «Ойнату тарихын тазалау» тармағына өтіңіз. Осы әрекеттен кейін барлық телешоу мен фильм «Келесі кезекте» тізімінен жойылады және қандай да бір ойнату тарихы аккаунтыңыздан жойылады. Бұл деректер Apple компаниясы бірдей Apple ID қолданылатын құрылғыларда сақтайтын және пайдаланатын ойнату деректеріне қатысты. Apple өнімі болып табылмайтын басқа құрылғыны пайдалансаңыз және платформа провайдеріне қаралатын контент туралы ақпарат беруді қаласаңыз, ойнату тарихын тазарту платформа провайдерінде сақталған ойнату деректеріне әсер етпейді. Платформа провайдерінің шарттарымен, құпиялылық саясатымен және тәжірибелерімен танысып шығуыңыз керек, сонда осы провайдер сақтаған деректерді жоя алатындығыңызды түсіне аласыз.
Белгілі бір объектілерді «Келесі кезекте» тізімінен жоюға болады. Ол үшін эпизодты басып тұрып, «"Келесі кезекте" тізімінен жою» пәрменін таңдаңыз. Егер дәл сол мәзірде «"Соңғы рет қаралғандар" тізімінен жою» опциясын таңдасаңыз, бұл эпизод жеке дербестендірілген ұсыныстарды жасау кезінде қолданылмайтын болады. Алайда Apple компаниясы бухгалтерлік есеп пен қаламақыларды төлеу үшін Apple TV арналарын және Apple TV+ контентін ойнату тарихы туралы жазбаларды сақтайды.
Қатысты үшінші тарап қолданбалары
Осы қолданбалар арқылы қаралатын мазмұнды Apple компаниясымен бөлісуді бастау үшін, үшінші тараптың серіктестік қолданбаларына Apple TV қолданбасына қосылуға рұқсат беруіңіз керек. Apple TV қолданбасын баптау кезінде, сізге бір уақытта бірнеше қолданбаға рұқсат беру опциясы ұсынылуы мүмкін. Кейбір қолданбалар бұл құрылғыға әлі орнатылмаған болуы мүмкін және параметрлеріңіз қолданбалар орнатылғаннан кейін қолданылады. Рұқсат берген-бермегеніңізге қарамастан, «Реттеулер» бөлімінде әр қолданбаның параметрлерін өзгертуге болады.
Егер сіз үшінші тарап қолданбасының Apple TV қолданбасымен байланысын жою қажет деп шешсеңіз, бұл қолданбаны Apple TV қолданбасынан ажырата аласыз, сонда Apple компаниясы үшінші тарап қолданбасынан ойнату деректерін жинауды тоқтатады. iOS, iPadOS немесе visionOS құрылғысындағы Apple TV қолданбасында «Аккаунт» > «Қосылған қолданбалар» тармағына өтіп, үшінші тараптық қолданбаны таңдаңыз да, оны өшіріңіз. tvOS құрылғысында «Реттеулер» > «Қолданбалар» > «TV» > «TV қолданбасына қосылу» тармағына өтіп, үшінші тараптық қолданбаны таңдаңыз да, оны өшіріңіз. Apple TV қолданбасынан үшінші тарап қолданбасын жойған кезде, «Ойнату тарихын жою және тазалау» опциясын таңдау арқылы Apple компаниясы жинаған қолданба арқылы қаралған барлық контентті ойнату деректері туралы ақпаратты жоюға болады. Сондай-ақ Apple компаниясы Apple TV қолданбасында көрген үшінші тарап контентіне қатысты жинаған барлық ойнату дерегін кез келген уақытта жоюға болады. Ол үшін ойнату тарихын жоғарыда сипатталғандай тазалаңыз. Мұнда сипатталған кез келген мысалда ойнату тарихын тазарту әрекеті Apple компаниясы Apple TV қолданбасы үшін сақтайтын және пайдаланатын үшінші тарап қолданбаларының ойнату деректерін жояды. Бұл кез келген үшінші тараптық қолданба провайдері бөлек сақтайтын (мысалы, жеке қолданбасында немесе серверлерінде) ойнату деректеріне әсер етпейді.
Сондай-ақ қолданылатын үшінші тарап қолданбаларының пайдалану шарттарымен, құпиялылық саясатымен және тәжірибелерімен танысып шығуыңыз керек, сонда олардың ойнату деректеріңізді және олармен байланысты ақпаратты қалай пайдаланатынын және бөлісетінін түсінуге болады.
Топтық ұсыныстар
Егер Apple TV құрылғысында «Топтық ұсыныстар» функциясын қосу қажет деп шешсеңіз, сіз көретін контент туралы ақпарат сол Apple TV құрылғысына қосылуға шешім қабылдаған пайдаланушылардың кез келген комбинациясында топтық ұсыныстар құру үшін пайдаланылады. Егер топта бала аккаунты болса, балаларға арналған ұсыныстар қосылады, бірақ олардың шолу тарихы пайдаланылмайды. Аккаунтыңыздың топтық ұсыныстарын кез келген уақытта «Реттеулер» > «Пайдаланушылар және аккаунттар» тармағына өтіп, профиліңізді таңдап, содан кейін «Барлық пайдаланушы үшін» тармағын таңдау арқылы өшіруге болады.
Алаяқтықтың және басқа зиянды әрекеттердің алдын алу
Сондай-ақ біз Apple TV қолданбасында алаяқтық пен басқа зиянды әрекеттердің алдын алу үшін жеке деректерді жинаймыз. Бұл ақпаратқа құрылғы туралы ақпарат, оның ішінде құрылғы түрі және бағдарламалық жасақтама нұсқасы, геолокация туралы ақпарат (бар болса), жүктеп алу және сатып алу тарихы, сондай-ақ Apple TV қолданбасындағы басқа да әрекеттер кіреді.
Сондай-ақ сатып алу кезінде, құрылғыны қалай пайдаланатыныңыз туралы ақпаратты, оның ішінде кіріс және шығыс телефон қоңырауларының немесе эл. хаттардың болжалды санын пайдалана отырып, құрылғыңыздағы құрылғының сенімділік индексін есептей аламыз. Индексті жіберген кезде, Apple компаниясына осы индексті есептеуге негіз болған мәндер берілмейді. Сенімділік индексі серверлерімізде белгілі бір уақыт ішінде сақталады.
Жеке деректерді өңдеу үшін қолданылатын құқықтық негіз
Біз Apple TV қолданбасында жеке деректеріңізді әдетте Apple компаниясымен келісімшартты орындау, қызмет көрсету үшін қажет болған жағдайда және заңды міндеттемелерімізді орындау үшін өңдейміз. Келісім тиісті заңды негізге сүйенсе, біз оны қолданыстағы жергілікті заңға сәйкес іздейміз.
Қолданыстағы жергілікті заңда қарастырылған жағдайда, біз заңды мүдделеріміз немесе үшінші тараптың мүдделері үшін қажетті жеке деректерді келесі мақсатпен өңдейміз:
- Сізге қолжетімді және сәйкес келетін контентті, соның ішінде үшінші тарап сервистерін көрсету
- Ұсыныстар алуға жарамдылықты тексеру, сервисті өзіңіз бен басқалар үшін жақсартуға және оңтайландыруға көмектесу және Apple TV қолданбасы және сізге ұнауы мүмкін басқа да Apple өнімдері, сервистері мен ұсыныстары жөнінде ақпарат жіберу
- Алаяқтықтың және басқа зиянды әрекеттердің алдын алу
Пайдаланылған деректер мыналарды қамтиды:
- Apple TV қолданбасын пайдалану тәсіліңіз, соның ішінде сіз пайдаланатын мүмкіндіктер (мысалы, «Келесі кезекте» немесе «Медиатека»), сіз іздеген элементтер, хабарландырулармен өзара әрекеттесуіңіз, сіз көз жүгіртіп шығатын немесе көретін контент беттері, сіз тамашалайтын, сатып алатын, жазылатын және жүктеп алатын контент және қолданбадағы қателер немесе ақаулар туралы ақпарат
- Құрылғыңыз бен аккаунтыңыз туралы мәліметтер
- Құрылғының сенім көрсеткіші
- Геолокацияңыз
Apple компаниясы жинаған ақпарат әрқашан Apple компаниясының құпиялылық саясатына (www.apple.com/privacy сайтында берілген) сәйкес өңделеді
2024 жылғы 5 наурызы