• Өтініміңіз туралы ақпарат үшінші тараптың адамның жеке басын анықтау сервисінің жеткізушілеріне беріледі. Бұл жеке басыңызды анықтау және алаяқтықтың алдын алу үшін қажет.
• Apple Inc. компаниясымен өзара әрекеттесуіңіз туралы белгілі бір ақпарат Apple Financing компаниясына несиелік шешімдер қабылдау процесін жақсарту көрсеткіштерін анықтау үшін беріледі және несиелік шешімдер қабылдау үшін пайдаланылуы мүмкін.
• Apple Pay Later бойынша алған несиеңіздің күйі iCloud сақтау орны немесе мультимедиаға жазылымдар сияқты басқа Apple Inc. өнімдері мен сервистеріне қол жеткізу мүмкіндігінізге әсер етпейді.
• Apple Financing біржақтылықты бағалауға және Apple Financing несиелік тәуекелін жақсартуға көмектесу үшін жалпыға қолжетімді ақпаратпен бірге өтініміңіз туралы ақпаратты талдайды.

Apple Pay Later сервисін Apple Inc. компаниясының еншілес компаниясы болып табылатын және толығымен соған тиесілі Apple Financing LLC компаниясы («Apple Financing») ұсынады және бұл қаржылық әл-ауқатыңызға назар аудару үшін құпиялылықты ескере отырып жасалған.

Apple Pay Later сервисіне өтініш беру

Apple Pay Later сервисін қолдануға өтінім бергенде, Apple Financing компаниясы сіздің аты-жөніңіз, туған күніңіз, телефон нөміріңіз және мекенжайыңыз туралы ақпаратты жеке басыңызды анықтау және алаяқтықтың алдын алу үшін пайдаланады. Apple Financing осы ақпаратты алаяқтықтың алдын алу үшін ғана пайдалануы мүмкін үшінші тараптың адамның жеке басын анықтау сервистерінің жеткізушілерінен алынған ақпаратты тексереді. Жеке басыңызды қорғау үшін сізден мемлекеттік орган берген жеке куәлігіңіздің алдыңғы және артқы жағын жүктеп салу, әлеуметтік сақтандыру нөмірін толығымен көрсету немесе Apple компаниясының адамның жеке басын анықтау сервисінің жеткізушілері сіздің жеке тұлғаңызға байланыстырған телефон нөміріңізге жіберілген тексеру кодын енгізу сияқты қосымша тексеру ақпараты сұралуы мүмкін. Жеке басыңызды анықтау мақсатында үшінші тараптың адамның жеке басын анықтау сервисінің жеткізушілеріне берілетін жеке куәлігіңіздің фотосы өтпелі шифрлаумен қорғалады. Жеке басыңызды анықтау және алаяқтықтың алдын алуда көмектесу үшін Apple Inc. компаниясы Apple аккаунтыңыз туралы ақпаратты (мысалы, аты-жөніңіз және Apple ID аккаунтымен байланыстырылған эл. пошта мекенжайыңыз) Apple Financing компаниясына ұсынатын болады.

Жеке басыңызды куәландыратын ақпарат Apple ID аккаунтымен байланысты болады және Apple Financing оны Apple Pay Later және барлық Apple Financing өнімімен бірге пайдалану үшін сақтайтын болады. Apple Financing шотыңыз бойынша ақпаратты жаңарту үшін Wallet қолданбасында Apple Pay Later картасын, содан кейін жоғарғы оң жақ бұрыштағы «Ақпарат» түймесін түртіп, «Жеке ақпарат» бөлімін түртіңіз.

Apple Pay Later шарттары мен талаптарын және Apple Financing компаниясының құпиялылық туралы хабарламасын қабылдамағанша, өтінішіңіз Apple Financing компаниясына несиені мақұлдау үшін жіберілмейді. Өтініш жіберілгеннен кейін, Apple Financing компаниясы несиені төлеу қабілетіңіз туралы соңғы есепті алу үшін тұтынушылардың несие төлеу қабілеттілігі туралы ақпаратты жинау және беру жөніндегі ұлттық агенттікке жеке басыңызға қатысты расталған ақпаратты бере алады. Apple Financing компаниясы несиені төлеу қабілетіңіз туралы есепті және сатып алынатын заттың бағасын, сондай-ақ Apple компаниясымен өзара әрекеттесуіңіз туралы кейбір ақпаратты несиелік ұсынысыңыздың шарттарын анықтау үшін қолдана алады. Сіздің несиені төлеу қабілетіңіз туралы есеп және сізге ұсынылған несиенің шарттарын, сондай-ақ Apple Financing компаниясы сізге ұсынатын несие шарттарын анықтау үшін пайдаланылатын кез келген басқа деректер Apple Financing компаниясында сіздің жеке басыңызды анықтауға болатындай үлгіде сақталады. Бұл сізге Apple Pay Later сервисін ұсыну, Apple Pay Later сервисінің жұмысын жақсарту және заңнаманы сақтау үшін қажет. Apple Financing компаниясы тұтынушы есебіңізді Apple Pay Later қолданбасына қатысты алаяқтықтың алдын алу үшін де пайдалануы мүмкін. Белгілі бір сатушыға Apple Pay Later мүмкіндігін пайдалануға өтініш бергенде, Apple Financing несиелік шешім қабылдау көрсеткіштерін анықтау және енгізу үшін сатып алу тарихыңызды емес, сол сатушының атын және санатын пайдалануы мүмкін.

Apple Pay Later бөліп төлеу сервисін жақсарту

Apple компаниясымен өзара әрекеттесуіңіз туралы белгілі бір ақпарат Apple Financing компаниясына берілуі мүмкін, ал Apple Financing компаниясы бұл ақпаратты несиелік шешімдер қабылдау процесін жақсарту көрсеткіштерін анықтау үшін пайдалануы мүмкін. Анықталған көрсеткіштер несиелік шешімдер қабылдау үшін пайдаланылуы мүмкін. Бөлісетін ақпарат төмендегідей ақпаратты қамтиды:

• Apple ID аккаунтымен бұрын немесе ағымдағы уақытта байланыстырылған құрылғылар.
• Apple Store дүкені, Apple.com сайты және Apple Store қолданбасы арқылы сатып алынған заттар (мысалы, сатып алынған өнімдер, бағасы, қолданылған қаржыландыру сипаты немесе төлем әдісі). Бұл ақпарат Apple компаниясына глюкоза деңгейін өлшеу құралын сатып алу сияқты құпия ақпаратқа қол жеткізуге мүмкіндік беретін сатып алу деректерін қамтымайды.
• Apple Pay карталары, мысалы, төлем картасын қосуға әрекетінген-әрекеттенбегеніңіз және оның сәтті немесе сәтсіз аяқталуы.
• Apple Card картасын алуға өтініш жібергеніңіз және осы картаның берілгені туралы ақпарат.
• Apple Payments Inc. арқылы жүзеге асырылған Apple Cash транзакциялары, соның ішінде транзакция түрі (қаражатты жіберу немесе алу) және транзакция сомасы. Бұл қаражатты кімге жібергеніңізді немесе кімнен алатыныңызды қамтымайды.
• App Store транзакциялары, соның ішінде транзакцияның жазылым ақысы үшін төленгені туралы ақпарат, қаржылық қолданбаларды жүктеп алу туралы ақпарат және пайдаланылған төлем әдісінің түрі. Бұл ақпарат қолданба әзірлеушісінің атын және сатып алынған контент немесе жүктеп алынған нысан туралы ақпаратты қамтымайды.

Apple Pay Later арқылы төлеу

Apple Pay Later сервисі арқылы төлеуді таңдасаңыз, Apple Financing компаниясы, Goldman Sachs Bank USA эмитент банкі, Salt Lake City бөлімі («Goldman Sachs») және төлем жүйесінің серіктесі (Mastercard), сондай-ақ олардың қызмет жеткізушілері Apple Pay Later сервисінің жұмысын қамтамасыз ету үшін сатушы, уақыт және соманы қоса алғанда, транзакцияңыз туралы ақпаратты алатын болады. Құпиялылығыңызды қорғау мақсатында Apple Pay Later сервисі арқылы қай жерде сауда жасағаныңыз және қандай сома төлегеніңіз туралы ақпарат Apple Financing компаниясында сақталып, Apple Inc. компаниясына берілмейді. Apple Financing компаниясы, Goldman Sachs банкі және Mastercard төлем жүйесі Apple Pay Later транзакцияларыңыз туралы ақпаратты жарнамалық немесе маркетингтік мақсатта үшінші тараптарға сатпайды.

Apple Pay Later сервисі бойынша алаяқтықтың алдын алу мақсатында Apple Financing сіздің транзакцияңыз және сол транзакция тағайындалған сатушы туралы ақпаратты пайдаланады. Бұл ақпарат Apple шотыңыз туралы ақпаратпен біріктіріледі, мысалы, меншігіңізде қандай құрылғылар болғаны; Apple Store, App Store және Apple Payments Inc. бойынша транзакцияларыңыз, Apple Pay сервисіне ұсынған деректеріңіз және Apple Card картасын алуға беру әдісі және картаны берілген-берілмегені туралы өтінім тарихы, сондай-ақ Apple Pay Later бөліп төлеу сервисіне берген өтінімдеріңіз, адамның жеке басын анықтау сервистері жеткізушілерінің жауаптары, алаяқтықтың алдын алу мақсатындағы транзакциялар және жеке басыңыздың расталғаны туралы ақпарат. Apple Pay сервисін пайдаланғандай, құрылғыңыз алаяқтықты анықтау үшін пайдалану үлгілерін (мысалы, құрылғының қозғалыстағы уақыты, аптасына шамамен келетін қоңыраулар саны) талдауы мүмкін. Құрылғыңыз талдайтын ақпарат Apple немесе Apple Financing компаниясына жеке басыңызды анықтай алмайтындай жолмен беріледі.

Apple Pay Later бойынша несие төлемдері

Apple Pay Later бойынша несие төлемдерін Apple Pay қолдайтын дебеттік карта арқылы төлеу қажет. Төлем әдісін таңдаған кезде, Apple Wallet қолданбасы Apple Pay сервисіне жарамды дебеттік карта мәліметтерін бұрын ұсынғаныңыз туралы ақпаратты тексереді және ұсынған болсаңыз, осы төлем әдісін пайдалануды ұсынатын болады. Егер жарамды дебеттік картаңыз болмаса, төлем жасау үшін Apple Pay сервисіне жаңа дебеттік картаны қосуыңыз керек. Apple Pay сервисіне жаңа дебеттік карта туралы деректерді ұсыну процесі «Apple Pay және құпиялылық» хабарламасында (www.apple.com/legal/privacy/data/en/apple-pay) көрсетілген ережелермен реттеледі. Apple Financing компаниясы Apple Pay Later несиелік төлемдері үшін пайдаланылатын төлем әдісі, соның ішінде дебеттік карта нөмірі, төлемдер жасалған күн және төлемді автоматты түрде тіркеу туралы ақпаратты төлемді аяқтау, алаяқтықтың алдын алу үшін қажет және заңмен талап етілетін кезең ішінде сақтайды.

Apple Pay Later бойынша алынған несиеңіздің күйі (мысалы, ағымдағы, мерзімі өткен) Apple Inc. компаниясының басқа өнімдері мен сервистеріне (мысалы, iCloud сақтау орны немесе медиа сервистерінің жазылымдары) қол жеткізу мүмкіндігіне әсер етпейді. Алайда Apple Financing компаниясы анықталған алаяқтық жағдайлары туралы Apple Inc. компаниясына хабарлайды, ал бұл сіздің Apple Inc. өнімдері мен сервистеріне, сондай-ақ Apple Financing ұсыныстарына қолжетімділігіңізге әсер етуі мүмкін. Сондай-ақ Apple Financing компаниясы тұтынушы есебі бар несиеңіздің күйі туралы ақпаратты бөлісуі мүмкін.

Apple Pay Later және аналитика

Apple Pay Later сервисін жақсарту үшін Apple Financing компаниясы Apple Pay Later сервисіне өтініш беру процесі және Apple Pay Later мүмкіндіктерін Wallet қолданбасында пайдалану туралы ақпаратты жеке басыңыз анықталмайтындай жинайды және сақтайды. Бұл ақпарат өтініш беруге жұмсалатын уақыт және жиі пайдаланылатын Apple Pay Later функциялары туралы деректерді қамтиды. Сондай-ақ Apple Financing компаниясы Apple Pay Later бөліп төлеу сервисіне қатысты басқа да ақпаратты (Apple Pay Later қолдау қызметіне хабарласу сияқты) жинайды, сондықтан мұндай ақпаратты сізбен байланыстыруға болады. Мұндай ақпарат Apple Pay Later сервисін жақсарту мақсатында ішкі талдау үшін пайдаланылуы мүмкін.

Біржақтылықтың алдын алу мақсатында Apple Financing компаниясының мамандар тобы сіздің гендерлік және нәсілдік қатыстылығыңыз туралы болжамдар жасау үшін өтініш деректерін жалпыға қолжетімді ақпаратпен салыстырады. Бұл топ анықталған сәйкестіктерді, сондай-ақ сіздің жасыңыз бен несие ұсынысының шарттары туралы мәліметтерді біржақтылықты анықтау үшін пайдаланады. Талдау нәтижелері (бірақ оның негізіндегі тұжырымдар немесе басқа да жеке ақпарат емес) Apple Financing компаниясының басқа мамандарына біржақтылықты бағалау және Apple Financing компаниясының несиелік тәуекелдерін бағалау сапасын жақсартуға көмектесу үшін хабарланады.

Apple Financing компаниясы Apple Pay Later бөліп төлеу сервисін қолданатыныңыз, сондай-ақ Apple аккаунтыңыз туралы адамның жеке басын куәландыратын ақпаратты қаржылық болжау сияқты ішкі талдау мақсаттары үшін пайдалануы мүмкін.

Apple Pay Later және байланыс

Apple Financing хабардың (соның ішінде маркетингтік) сізге қатысты екенін анықтау үшін Apple Pay Later шотыңыздың күйін, мысалы, өтініш берген-бермегеніңіз немесе қолданыстағы Apple Pay Later шотының бар-жоғы туралы ақпаратты пайдалануы мүмкін. Apple Inc. компаниясы Apple аккаунтыңыз туралы шектеулі ақпаратты (мысалы, Apple ID аккаунтын жасағаныңызға қанша уақыт болды және қандай да бір Apple сервисін қолданасыз ба) Apple Financing компаниясына маркетингтік мақсаттарда ұсынуы мүмкін. Сондай-ақ Apple Financing компаниясы құрылғыңызға хабарлар жіберуі мүмкін, ол хабардың сізге қатысы бар-жоғын анықтау үшін Apple немесе Apple Financing компаниясына қолжетімді емес, бірақ сізге және құрылғыңызға белгілі ақпаратты пайдалануы мүмкін. Apple Financing компаниясы құрылғыңызда қандай хабарларды көретініңізді білмейді.

Сонымен қатар Apple Financing компаниясы Apple Inc. компаниясына Apple Pay Later сервисін қолданғаныңыз туралы ақпаратты хабарлай алады. Apple Inc. мұндай ақпаратты тек Apple өнімдерімен және сервистерімен танысуға көмектесу үшін қолданады.

Сізбен байланысы жоқ анонимді және жалпыланған ақпарат Apple Pay Later маркетингтік және басқа хабарлары үшін қолданылуы мүмкін. Жарнамалық хабарларды эл. пошта арқылы алудан бас тарту сілтемесін басу немесе Apple Pay Later және Wallet қолданбасының хабарландыруларын өшіру арқылы жарнамалық хабарландыруларды алудан бас тартуға болады.

Apple Pay Later қолдау қызметі

Apple Pay Later қолдау қызметі арқылы қолдау көрсету бойынша сұрауыңызды өңдеуге көмектесу үшін Apple Inc. арнайы жүйелеріне сүйенетін Apple Pay Later қызметіне қатысты сұрақтарыңыз болса, Wallet қолданбасынан хабарларды ашып, қолдау көрсету қызметіне немесе Apple Pay Later қолдау қызметіне тікелей хабарласуға болады. Apple Pay Later қолдау сұрауы туралы анықталатын қаржылық ақпарат сіздің келісіміңізсіз Apple Inc. компаниясында сақталмайды немесе басқа жолмен жіберілмейді. Apple Financing компаниясы сұрауыңызды өңдеу үшін сіз бөлісетін кез келген ақпаратты, соның ішінде жеке ақпаратты пайдаланады. Сұрауыңыздың сипатына байланысты (мысалы, дау туындаған жағдайда) Apple Financing компаниясы мәселені шешу мақсатында сұрауыңыз туралы ақпаратты Apple Pay Later эмитент банкіне, төлем желісінің серіктесіне немесе сатушыға беруі қажет болуы мүмкін.

Apple Pay Later шотын жабу

Apple қолдау көрсету орталығына хабарласу арқылы Apple Pay Later шотын жабуға болады. Apple Financing қандай да бір жеке деректерді заң талаптарына сәйкес сақтауды жалғастырады.

Apple Pay Later және сатушылар

Веб-сайтта немесе қолданбада қандай да бір зат сатып алғыңыз келсе, сатушы Apple Pay Later төлем опцияларын көрсету мақсатында құрылғыңыздың Apple Pay Later сервисін қолдайтынын тексеруі мүмкін. Сатушылар бұл ақпаратты құрылғыңыздың операциялық жүйесі Apple Pay Later сервисін қолдайтынын анықтау үшін пайдалануы мүмкін. Мұндай ақпарат сатушының құпиялылық саясатына сәйкес өңделеді. Сатушы веб-сайтында немесе қолданбасында Apple Pay түймесін түрту арқылы Apple Pay Later бөліп төлеу сервисі бойынша төлем жасай аласыз. Apple Pay түймесінің жанында Apple Pay Later туралы қосымша ақпарат және сіз сатып алған зат туралы ақпарат (Apple Financing компаниясы ұсынатын) болуы мүмкін.

Талаптарға сәйкестігі

Құрылғыңыз iOS 16 немесе одан кейінгі нұсқасына жаңартылған кезде, Apple Pay Later сервисін баптауға мүмкіндік алу үшін сіздің жасыңыз, сіз тұрып жатқан ел және құрылғыңыздың операциялық жүйесінің нұсқасы туралы ақпарат Apple компаниясына жіберіледі. Бұл ақпарат сіздің АҚШ аумағында Apple Pay Later сервисін пайдалануға құқылы жасқа жеткеніңізді және құрылғыңыздың операциялық жүйесі Apple Pay Later сервисін қолдайтынын растау үшін қажет. Apple Pay Later сервисін пайдалануға құқығыңыздың бар-жоғы туралы ақпарат Apple Pay Later төлем опцияларын Wallet қолданбасында немесе Apple Pay есеп айырысу қағазында көрсету үшін қолданылады. Веб-сайтта немесе қолданбаларда Apple Pay сервисін пайдаланғанда, Apple Pay Later бөліп төлеу опцияларын бұдан былай көргіңіз келмесе, «Реттеулер» > «Wallet және Apple Pay» тармағына өтіп, «Apple Pay Later опциясын көрсету» опциясын өшіріңіз.

Толығырақ ақпарат

Егер Apple Financing компаниясы сіздің Apple Financing компаниясымен өзара әрекеттесуіңіз алаяқтықпен байланысты екенін растаса немесе сауда санкцияларының талаптарын сақтау мақсатында Apple Financing компаниясы Apple Pay Later сервисінде қолданылған жеке деректеріңіз (мысалы, аккаунт идентификаторы) туралы шектеулі ақпаратты Apple Inc. компаниясына қауіпсіздікті қамтамасыз ету, алаяқтықтың алдын алу және талаптарды сақтау үшін беруі мүмкін.

Apple Financing сіздің Apple Financing компаниясымен өзара әрекеттесуіңіз туралы ақпаратты Apple Financing атынан физикалық хаттар жіберетін компаниялар сияқты сервис провайдерлеріне таратуы мүмкін. Ал олар өз кезегінде бұл ақпаратты осы құжатқа және Apple Financing нұсқауларына сәйкес өңдеуге, алынған жеке деректерді қорғау мақсатында тиісті қауіпсіздік шараларын қабылдауға, сондай-ақ заңнама жеке ақпаратты сақтауды талап етпесе немесе сіз оны сақтауға келісім бермесеңіз, сервис провайдерлері қызметті көрсетіп болған соң бұл жеке ақпаратты жоюға міндетті.

Apple және Apple Financing компаниясы жинаған ақпарат әрқашан Apple компаниясының құпиялылық саясатына (www.apple.com/privacy сайтында берілген) сәйкес өңделеді

2023 жылғы 24 қазаны