• News және «Акциялар» қолданбасындағы оқу және тыңдау әрекетіңіз News және «Акциялар» қолданбасына тән идентификатормен байланыстырылады, ал Apple ID немесе басқа Apple қызметтерімен байланыстырылмайды.
• Функцияларды жеке қызығушылықтарыңызға сай жекелендіру үшін Apple News сервисін қалай пайдаланатыныңыз туралы ақпарат жинаймыз. Бұл ақпарат Apple ID аккаунтыңызбен байланысты емес.
• News және «Акциялар» қолданбасындағы жарнамалардың сізге сәйкес келетініне көз жеткізу үшін аккаунтыңыз, сіз оқыған жаңалықтардың тақырыптары мен санаттары және сіз бақылайтын, жазылатын жарияланымдар туралы ақпаратты пайдалануымыз немесе хабарландыруларды қосуымыз мүмкін. App Store дүкеніндегі жарнамаларды дербестендіру үшін жазылымдарыңыз жөніндегі ақпаратты да пайдалануымыз мүмкін. Төменде сипатталғандай, бұл жарнаманың реттеулерін басқаруға болады.
• Apple News сервисінде пайдалануға болатын қандай да бір белсенді жазылымдардың Apple ID аккаунтыңызда бар-жоғын тексереміз.
• Арна хабарландыруларын қосқан кезде, сол арнаны Apple ID аккаунтыңызбен байланыстыра аламыз.

Жеке деректердің құпиялылығы мен қауіпсіздігін қамтамасыз ету барлық Apple қызметкері үшін басымдық болып табылады. Біз ұсынатын сервистерді жақсарту үшін тек қажетті деректерді жинауға бар күшімізді саламыз. Саналы шешім қабылдауыңыз үшін, деректерді жинаған кезде оларды жинау туралы, сондай-ақ жинау себебі туралы хабардар етеміз. Apple News сервисі басқа да Apple өнімдері мен сервистері сияқты осы қағидаларға негізделіп жасалған.

Apple News жұмысын қамтамасыз ету

Біз сіздің қандай мақалаларды оқығаныңыз және тыңдағаныңыз туралы ақпараттың жеке ақпарат болып саналатынын түсінеміз, сондықтан News және «Акциялар» қолданбасын, оқу және тыңдау әрекеттеріңіз, сондай-ақ Apple News сервисін қалай пайдаланатыныңыз Apple ID аккаунтыңызбен және басқа Apple сервистерімен байланысты болмайтындай етіп әзірледік. Жиналатын деректер тек News және «Акциялар» қолданбасында пайдаланылатын идентификатормен байланысты болады.

Apple компаниясы функцияларды жеке қызығушылықтарыңызға сай дербестендіру үшін Apple News сервисін қалай пайдаланатыныңыз туралы ақпарат жинайды. Мысалы, «Today» (Бүгін) функциясы сізге ұнайтын арналар мен тақырыптар негізінде жеке іріктелген ең үздік мақалалардан тұратын жаңалықтар жинағын ұсынады. Apple компаниясы осындай функциялардың жұмысы үшін Apple News сервисін қалай пайдаланатыныңыз туралы ақпаратты, оның ішінде қандай мақалаларды оқитыныңыз, сақтайтыныңыз немесе бөлісетініңіз, сондай-ақ қандай тақырыптар мен арналарға жазылғаныңыз туралы ақпаратты жинайды.

Apple News қолданбасындағы ұсыныстар құрылғыңызда сақталған ақпарат негізінде жасалады. Оқу және тыңдау тарихын тазалау үшін iOS немесе iPadOS құрылғыңыздағы News қолданбасының «Тарих» бөлімінде «Тазалау» түймесін түртіңіз немесе басыңыз. Mac компьютерінде «News» > «Тарихты тазалау» тармағына өтіп, «Тарихты тазалау» түймесін басыңыз. Бұл жағдайда News және «Акциялар» үшін қолданылатын идентификатор да бастапқы күйге қайтарылады. Сондай-ақ оқу және тыңдау тарихын тазаламай-ақ идентификаторды нөлдеуға болады. Ол үшін iOS немесе iPadOS құрылғысында «Реттеулер» > «News» тармағына өтіп, «Идентификаторды нөлдеу» параметрін қосыңыз. Mac компьютерінде News қолданбасын ашып, «News» > «Тарихты тазалау» тармағына өтіңіз де, «Идентификаторды нөлдеу» түймесін басыңыз.

Apple News сервисінде арна үшін хабарландыруларды қоссаңыз, біз бұл ақпаратты арнадағы маңызды мақалалар мен жаңа жарияланымдар туралы хабарлау үшін пайдаланамыз. (Жаңа жарияланымдар туралы хабарландырулар тек Apple News+ жазылушыларына және тек iOS және iPadOS құрылғыларында қолжетімді.)

Apple News сервисінде іздеу функциясын пайдаланған кезде, белгілі бір ақпарат, соның ішінде жазылымдар іздеу сұрауымен бірге Apple компаниясына жіберіледі. Соның арқасында сізге қатысты іздеу нәтижелері көрсетілетін болады және іздеу функциясы жақсарады. Бұл ақпарат Apple ID аккаунтыңызбен байланысты емес.

Егер Apple News қолданбасына геолокацияңызға қол жеткізуге рұқсат берсеңіз, жуықтама геолокацияңыз сізге жергілікті жаңалықтар, ауа райы, іздеу нәтижелері және жарнамалар сияқты қатысы бар ақпаратты ұсыну үшін пайдаланылуы мүмкін. Сонымен қатар сізге геолокацияңыз және Apple News қолданбасындағы белсенділігіңіз негізінде арналар мен тақырыптар ұсынылуы мүмкін. Бұл ақпарат Apple ID аккаунтыңызбен байланысты емес.

iOS немесе iPadOS құрылғысында геолокацияға негізделген функциялардан бас тартуға болады. Ол үшін «Реттеулер» > «Құпиялылық және қауіпсіздік» > «Геолокация сервистері» тармағы арқылы өтіп, «News» параметрін түртіп, «Ешқашан» нұсқасын таңдаңыз. Mac компьютерінде «Жүйе реттеулері» > «Құпиялылық және қауіпсіздік» > «Құпиялылық» > «Геолокация сервистері» тармағына өтіп, «News» опциясынан құсбелгіні алып тастаңыз.

Siri көмекшісі сіз пайдаланатын қолданбалардан және Safari браузері арқылы қараған веб-сайттардан алынып, құрылғыда сақталған ақпаратқа сүйене отырып, сізге ұнауы мүмкін мақалаларды, арналарды және тақырыптарды ұсынады. Бұл ақпарат Apple компаниясына жіберілмейді. Бұл функцияны кез келген уақытта өшіруге болады. Ол үшін iOS немесе iPadOS құрылғысында «Реттеулер» > «News» > «Siri және іздеу» тармағына өтіп, «Қолданбада көрсету» параметрін өшіру үшін түртіңіз. Mac компьютерінде «Жүйе реттеулері» > «Siri және Spotlight» > «Siri ұсыныстары мен құпиялылық» тармағына өтіп, News бөлімін басыңыз да, «Siri ұсыныстарын қолданбада көрсету» опциясынан құсбелгіні алып тастаңыз.

Ыңғайлы болу үшін Apple News сервисі жұмысын барлық құрылғыңызда синхрондау мақсатында iCloud сервисін пайдаланады. Мысалы, Apple News сервисі iCloud бұлтын сіз оқыған және тыңдаған нәрселер, жазылған арналар мен тақырыптар, оқу және тыңдау бойынша жеке параметрлеріңіз туралы деректерді сақтау үшін пайдаланады, осылайша Apple News сервисі барлық құрылғыңызда синхрондалады. Оқу және тыңдау тарихының сақталу мерзімі үш айдан аспайды. Арна немесе тақырып жазылымын тоқтатсаңыз немесе «Сақталған мақалалар» тізімінен немесе оқу тарихынан мақаланы жойсаңыз, бұл ақпарат Apple компаниясының серверлерінен дереу жойылады. Apple News үшін iCloud cервисі арқылы синхрондауды өшіріп, бұл функцияны кез келген уақытта өшіруге болады. Ол үшін iOS немесе iPadOS құрылғысында «Реттеулер» > «[сіздің атыңыз]» > «iCloud» тармағына өтіп, «News» параметрін өшіру үшін түртіңіз. Mac компьютерінде «Жүйе реттеулері» > «[сіздің атыңыз]» > «iCloud» тармағына өтіп, News қолданбасы жанындағы құсбелгіні алып тастаңыз. Бұл функцияны өшірсеңіз, «iCloud сақтық көшірмесі» функциясы қосылған болса, сіз жазылған арналар мен тақырыптардың, оқу және тыңдау тарихының, оқу және тыңдау бойынша жеке параметрлердің сақтық көшірмесі iCloud бұлтына сақталады.

Жазылымдар

Егер Apple News+ сервисіне жазылсаңыз, тек жазылушыларға арналған алуан түрлі шығарылымдардағы контентке қол жеткізе аласыз. Сонымен қатар тек жазылым бойынша қолжетімді жеке шығарылымдардағы контентке бірнеше жолмен қол жеткізуге болады.

Бірінші жағдайда Apple News қолданбасы App Store дүкеніндегі Apple News қолданбасында пайдаланылуы мүмкін белсенді жазылымдардың бар-жоғын көру үшін Apple ID аккаунтыңызды тексереді. Егер жазылым болса, Apple News қолданбасы жазылымның құлпын автоматты түрде ашып, сізге ақылы мақалаларға қол жеткізу рұқсатын береді. Екінші жағдайда нақты бір басылым жазылымын тікелей News қолданбасынан сатып алуға болады. Бұл ретте басылымға жеке ақпаратыңызды беру-бермеуді таңдай аласыз. Үшінші жағдайда жазылымды бұрын басылымнан тікелей сатып алған болсаңыз (мысалы, басылымның веб-сайтында), баспагер сізге жазылым аккаунты арқылы Apple News сервисіне кіру мүмкіндігін бере алады. Содан кейін басылым сервисі жазылымыңызды растап, Apple News сервисіндегі ақылы контентіне қол жеткізуге мүмкіндік береді.

Apple News+ сервисінде ұсынылған бір басылымға жазылған болсаңыз, Apple News+ жазылымыңыз болмаса да, сол басылымдағы ақылы контентке қол жеткізе аласыз.

Кейбір елдерде жеке мақалалардың аудионұсқалары және Apple News редакторлары таңдаған күнделікті мақалалардың аудиошолуы бар. «Аудио» қойындысы iPhone, iPod touch және CarPlay жүйесінде қолжетімді. Толық аудиомақалалар тек Apple News+ жазылушыларына қолжетімді. Жазылымсыз тек қысқа үзіндіні тыңдауға болады. Мақалалардың аудиошолуы жазылыммен де, жазылымсыз да қолжетімді.

Мақалалардың аудионұсқалары мен аудиошолулары Apple компаниясының сандық құқықтарды басқаруға (СҚБ) арналған FairPlay Streaming атты бағдарламалық ортасымен қорғалған. Ол сандық контентке және оның шифрлануына қол жеткізу мүмкіндігін басқарады. Apple News сервисі шифр ашу кілттерін контенті бар бірнеше файлға жібереді, соның арқасында Apple компаниясы құрылғыңыз сұрайтын кілттер арқылы тыңдау тарихына қол жеткізе алмайды.

Apple Podcasts

Apple News аудио контенті Apple Podcasts сервисінде қолжетімді. Мұндай контентті Apple Podcasts сервисінде тыңдасаңыз, тыңдау белсенділігіңізге www.apple.com/legal/privacy/data/en/apple-podcasts сілтемесіндегі «Apple Podcasts және құпиялылық» ережелері қолданылады. Мысалы, құрылғылар арасында синхрондау үшін Apple сіз тыңдайтын подкаст эпизодтарының ойнату орнын біледі.

Кері байланыс

Apple компаниясы Apple News+ және сізге ұнауы мүмкін басқа Apple өнімдері, сервистері мен ұсыныстары, сондай-ақ Apple One жөнінде ақпарат жіберу үшін Apple өнімдеріңіз бен сіз жазылған Apple сервистері сияқты аккаунтыңыз туралы ақпаратты пайдалануы мүмкін. Құрылғының сериялық нөмірі сізге сәйкес сервистік ұсыныстарды беру үшін пайдаланылуы мүмкін. «Отбасылық қол жеткізу» функциясын пайдалансаңыз, Apple компаниясы «Отбасылық қол жеткізу» аясында өнімдер, сервистер және ұсыныстар туралы ақпарат жіберуі мүмкін. Apple One жазылымын алсаңыз, сіз жазылған сервистерде қолжетімді функциялар туралы эл. пошта хабарлары мен push хабарландыруларын жіберуіміз мүмкін. Сондай-ақ Apple компаниясы Apple News сервисінде қолжетімді жаңа функциялар, контент пен ұсыныстар жөнінде эл. пошта хабарлары мен push хабарландыруларын жіберу үшін Apple News сервисіндегі белсенділігіңіз туралы ақпаратты пайдалануы мүмкін. Эл. пошта параметрлерін өзгерту және осы эл. хабарларды алудан бас тарту үшін мына сайтқа өтіңіз: appleid.apple.com. iOS немесе iPadOS құрылғысында хабарландыру параметрлерін жаңарту үшін «Реттеулер» > «Хабарландырулар» > «News» тармағына өтіңіз. Mac компьютерінде News қолданбасын ашып, «Файл» > «Хабарландыруларды және эл. поштаны басқару» тармағына өтіңіз. Apple компаниясы сервистерімізді жақсарту үшін байланыстарымызбен, соның ішінде хабарландырулармен өзара әрекеттесуіңіз туралы ақпаратты пайдаланады.

Жарнама

Сізге үздік басылымдардың қызықты контентін тегін ұсыну үшін Apple News сервисі жарнаманы қамтиды. «Дербес жарнамалар» реттеуі қосулы болса, Apple компаниясының жарнама платформасы аккаунтыңыз, сіз оқыған жаңалықтардың тақырыптары мен санаттары және сіз бақылайтын, жазылатын жарияланымдар туралы ақпаратты сізге сәйкес келетін жарнамалар көрсету үшін пайдалануы немесе хабарландыруларды қосуы мүмкін. App Store дүкеніндегі жарнамаларды дербестендіру үшін жазылымдарыңыз жөніндегі ақпаратты да пайдалануымыз мүмкін. «Дербес жарнамалар» параметрін өшірсеңіз, Apple қызметі бұл ақпаратты таргеттелген жарнама үшін пайдалана алмайды. Бұдан көрсетілетін жарнамалар саны азаймайды, бірақ сізге қатыссыз жарнамалар көрсетілуі мүмкін. iOS немесе iPadOS құрылғысында «Дербес жарнамалар» функциясын өшіруге болады. Ол үшін «Реттеулер» > «Құпиялылық және қауіпсіздік» > «Apple жарнамасы» тармағына өтіп, «Дербес жарнамалар» параметрін өшіріңіз. Mac компьютерінде «Жүйе реттеулері» > «Құпиялылық және қауіпсіздік» тармағына өтіп, «Apple жарнамасы» бөлімін таңдаңыз, содан кейін «Дербес жарнамалар» опциясынан құсбелгіні алып тастаңыз. Apple News қолданбасында оқылатын және тыңдалатын мақалалар туралы деректер сізге News немесе «Акциялар» қолданбаларын пайдаланған кезде ғана жарнама жіберу үшін қолданылады.

Ақпаратты үшінші тараптарға жариялау

Үшінші тараптарға жеке деректеріңіз жіберілмейді. Өнімдеріміз бен сервистерімізді әзірлеу үшін Apple компаниясымен бірге жұмыс істейтін, сондай-ақ маркетингтік қызметті жүргізуге және Apple News сервисінде көрсету үшін Apple атынан жарнамалық қызметтерді сатуға көмектесетін стратегиялық серіктестерімізге жеке басыңызға қатысы жоқ деректерді беруге міндеттіміз. Мысалы, Apple компаниясы баспагерлерге төлеу үшін Apple News сервисін қалай пайдаланатыныңыз туралы жеке басыңызға қатысы жоқ деректерді пайдалануы және Apple News баспагерлері жариялайтын контенттің қалай оқылып, пайдаланылатыны туралы толық түсінік алуға көмектесу үшін оларға жиынтық есептерді жіберуі мүмкін. Осы жиынтық есептердің кейбірінде пайдаланушылардың демографиялық мәліметтері, мысалы, олардың жасы мен жынысы туралы мәліметтер бар. Жыныс туралы мәліметтерді атыңызды және Apple ID аккаунтыңыздың реттеулерінде таңдалған жеке сәлемдесуіңізді талдау арқылы алуға болады. Сонымен қатар Apple компаниясы ақпаратты өңдеу, тұтынушыларға қызмет көрсету, өнімдеріміз бен сервистерімізге пайдаланушылардың қызығушылығын бағалау және тұтынушылардың қанағаттану дәрежесін анықтау мақсатында біздің атымыздан зерттеулер мен сауалнамалар жүргізу сияқты сервистерді ұсынатын сервис провайдерлеріне ақпарат жіберуі мүмкін. Бұл компаниялар ақпаратыңызды қорғауға жауапты және Apple компаниясы жұмыс істейтін кез келген аймақта орналасуы мүмкін.

Apple News ішінде жеке жарияланымға жазылымды сатып алғанда, Apple сіз және жариялаушы үшін бірегей болатын жазылушы идентификаторын жасайды. Жазылушы идентификаторы жарииялаушыға сіз сатып алған жазылым және сіз тұратын ел немесе аймақ туралы ақпаратты қамтитын есептерді ұсыну үшін пайдаланылады, сонда жариялаушылар жазылымдарының өнімділігін түсіне алады. Белгілі бір жариялаушының барлық жазылымынан бас тартсаңыз және қайта жазылмасаңыз, жазылушы идентификаторын 180 күннен кейін бастапқы күйіне қайтаруға болады.

Apple News сервисі сонымен қатар өз контентін басқа веб-сайттар мен әлеуметтік желілерде бөлісуге мүмкіндік береді. Басқа веб-сайттарда немесе әлеуметтік желілерде Apple News контентін бөліскен кезде, бөлісетін ақпарат сол веб-сайттардың немесе әлеуметтік желілердің құпиялылық саясаттарына сәйкес өңделеді. Бұл ақпараттың үшінші тараптарға жіберілуін қаламасаңыз, Apple News контентін үшінші тарап веб-сайттарында немесе әлеуметтік желілерде бөліспеңіз.

Жеке басыңызға қатысы жоқ деректерді кез келген мақсатта жинауымыз, пайдалануымыз, жіберуіміз және жариялауымыз мүмкін. Мысалы, сервисті жақсарту мақсатында жеке басыңызға қатысы жоқ деректерді басқа Apple News пайдаланушыларының ұқсас деректерімен біріктіруіміз мүмкін.

Жеке деректерді өңдеу үшін қолданылатын құқықтық негіз

Біз Apple News қолданбасында жеке деректеріңізді әдетте Apple компаниясымен келісімшартты орындау, қызмет көрсету үшін қажет болған жағдайда және заңды міндеттемелерімізді орындау үшін өңдейміз. Келісім тиісті заңды негізге сүйенсе, біз оны қолданыстағы жергілікті заңға сәйкес іздейміз.

Қолданыстағы жергілікті заңда қарастырылған жағдайда, біз заңды мүдделеріміз немесе үшінші тараптың мүдделері үшін қажетті жеке деректерді келесі мақсатпен өңдейміз:

• Сізге қолжетімді контентті көрсету
• Ұсыныстар алуға жарамдылықты тексеру, сервисті өзіңіз бен басқалар үшін оңтайландыру және жақсарту, сондай-ақ Apple News қолданбасы және сізге ұнауы мүмкін басқа да тиісті Apple өнімдері, сервистері мен ұсыныстары, соның ішінде Apple One жөнінде ақпарат жіберу

Пайдаланылған деректер мыналарды қамтиды:

• Аккаунтыңыз, жарияланымдар мен Apple сервистеріне жазылымдар, иелігіңіздегі Apple өнімдері және «Отбасылық қол жеткізу» тобында бар-жоғыңыз туралы мәліметтер
• Сіз хабарландырулар қосқан арналар

Деректерді сақтау

Apple News сервисіне қатысты жеке деректерді іскерлік қажеттілік, келісімшарттық міндеттеме немесе заңды талаптар болғанша ғана сақтаймыз. Жазылымды сатып алу тарихы сияқты (сақталған карта мәліметтерінен басқа) деректер тіпті аккаунтыңызды жапқаннан кейін немесе Apple News+ жазылымынан бас тартқаннан кейін де бухгалтерлік жазбаларда сақталуы мүмкін. Сақтау мерзімдерін бағалау кезінде алдымен жиналған жеке деректерді сақтау қажет пе, жоқ па, соны мұқият тексереміз және сақтау қажет болса, жеке деректерді заңмен рұқсат етілген ең қысқа мерзім ішінде сақтау үшін жұмыс істейміз.

Apple жинаған ақпарат әрқашан Apple құпиялылық саясатына (www.apple.com/privacy) сәйкес өңделеді

2023 жылғы 18 қыркүйек